Gardsbesøk på Hauane gard

Kom på besøk til Lillian og Sigurd og hels på kyr, kviger, kalvar og sauer på beite, høns, kyllingar og kattar på tunet og bli med i grønsaksåkeren og kjenn den gode smaken på det som veks der.

Hauane gard er ein tradisjonell vestlandsgard som driv med mjølk- og kjøtproduksjon og i tillegg dyrking av grønsaker i småskala – utan bruk av kunstgjødsel eller sprøytemiddel.  Bøndene Lillian og Sigurd driv garden saman med god hjelp av familien som tek aktivt del i gardsarbeidet.

Garden ligg i eit flott kulturlandskap og populært turområde på Revheim omlag 4 km frå Lonevåg og 9 km frå Valestrand.  På garden vil du møta både den yngre og eldre generasjonen som har mykje spennande og interessant å fortelja om gardsdrift og matproduksjon i notid og fortid.

Pensjonistbonden og bygningsmannen Rune kan gje ei levande forteljing om livet på garden i gamle dagar, og ta deg med på omvisning i Gamlahuset frå 1833 og Gamlafloren frå 1848.

I Oppigardsløo frå 1909 vil du få sjå og verta fortalt om den tradisjonelle og spesielle byggeskikken med brakakledning og stavbygg.

På garden har det i fleire generasjonar vore drive med attåtnæring knytta til bygningsarbeid, men også ull har vorte foredla til tovesko.

Periode: Frå juni til oktober tek vi imot avtalte besøk av grupper på 4 - 8 personar.
Tid: Omlag 2 timar.       
Pris:

• Vaksne Kr 375,       

• Born Kr 190.-